Erakusketa: "Paul Naschy - Autobiografia bat iruditan"

Donostiako Okendo Kultur Etxeak, Fantasiazko eta Beldurrezko Zinemaren Astearen barruan, "Paul Naschy - Autobiografia bat iruditan" erakusketa aurkezten du.

  • Komisarioa: Antonio Busquets (Flash-Back Producciones)

Erakusketa hau, dudarik gabe, Paul Naschyk (Jacinto Molina Alvarez, 1934-2009) bere bizitzan eta lanbidean izan zuen ibilbideari inoiz egin zaion aitortza zabalena eta osatuena da. Bere familiak erakutsitako konfiantzari esker ‒haren alargun Elvira Primavera eta Sergio eta Bruno semeak‒ omenduaren artxibo pertsonala lagako da erakusketarako. Hala, aurretik inoiz ikusgai egon ez diren materialak ikusi ahal izango dira, haren scrapbook zoragarriak eta idazmahaia, besteak beste.

Paul Naschy Europako fantasiazko zinemaren historian izan den irudi garrantzitsuenetako bat da. Erakusketak osorik biltzen du bere karrera joria: bere aurreneko lanak disko-azaletako ilustrazio bikainen sortzaile gisa, poltsikoko nobelen autore gisa izan zuen etapa labur eta bitxia, halterofilian egin zuen karrera arrakastatsua noski, eta bere azkeneko agerraldiak pantaila handian. Jakina, Espainiako zinemari egin zion ekarpen izugarri handia eta ahaztezina izango da erakusketaren muina, bere lan oparoan oinarritua: hogei pelikula baino gehiago zuzendu zituen, hainbat eta hainbat gidoi eta ehunetik gora kreditutan ageri da aktore gisa, eta zenbait hamarkadatan, hirurogeiko urteetatik hasita, hezurmamitu zituen beldurrezko zinema klasikoko mito gailenak; bera ere generoko mito bilakatzeraino, nazioartean errespetatua eta txalotua.

Erakusketak, gainera, lehen aldiz aurkeztuko ditu artistaren eta berarekin lan egin zuten profesionalen ‒atrezzo, jantzi, makillaje, efektu berezi eta abarreko sailetakoak‒ biltegietako eta artxiboetako edukiak. Enpresa eta izen mitikoek ‒besteak beste, Vazquez Hermanos, Cornejo, Molina FX edo Julian Ruiz, Miguel Sese, Angel Luis de Diego eta Fernando Florido makillatzaileak‒ eta ilustrazioak, istorietak, diseinuak, kartelak eta bozetoak, Jose Sanchis, Gumersindo Andres Lopez, Jano, Antonio Gracia Jose "Pierrot" eta beste hainbat eta hainbat autore ahaztezinek sortuak.

Bazen behin... hamar urteko ume bat Jacinto izenekoa, 1944an, liluratuta geratu zena Frankenstein Meets the Wolf Man pelikula ikusi ondoren. Harrezkero, handitan likantropo bat izatea izango zuen amets. Hau da bere istorioa.

Marrazkia eta kirola ziren gaztetako bere zaletasunak. Gerora, etapa labur baina bitxi bat izan zuen poltsikoko nobelak idazten, eta disko azaletako ilustratzaile bikain bat ere izan zen denboraldi batez. Garai hartan, ordea, bere etaparik nabarmenena hauxe izan zen: eliteko kirolari zela halterofiliako Espainiako lehiaketa irabazi zuen 1958an, eta 28 errekor absolutu hautsi zituen, nazioarteko mailara heldu zen arte.

Hamar urte geroago, 1968an, gauzatu egin zen bere haurtzaroko ametsa, La marca del hombre lobo idatzi eta protagonizatu zuenean. Horretan eman zituen ondorengo lau hamarkadak, 2009an zendu zen arte zineman arrakasta handiko karrera eraikita utzita. Hogei bat film luze zuzendu zituen, baita dokumental onak eta txalotuak egin ere. Gidoi ugari idatzi zituen, eta aktore izan zen ehunetik gora filmetan, Paul Naschy goitizenez. Hala lortu zuen garai guztietako fantasiazko zinemak eman dituen izen handien artean egotea, eta hirurogeitik gora sari nazional eta nazioarteko eskuratzea, mundu osoan jaso izan zituen aintzatespenak ahaztu gabe. 2001ean Arte Ederretako Urrezko Domina eman zioten.

Paul Naschyk beti gogoan izango ditugun rolak utzi ditu historian: Gilles de Lancre, Gotho, Amenhotep, Alaric de Marnac eta, jakina, Waldemar Daninsky likantropoa. Beldurrezko zinema klasikoko mito nagusiak hezurmamituta, ikono bihurtu zen generoan, nazioartean errespetatua, besteak beste film hauei esker: La noche de Walpurgis, El gran amor del conde Drácula, El mariscal del infierno, Inquisición, El huerto del francés, El retorno del hombre lobo eta La bestia y la espada mágica.

Fantasiazko generoa biziki maite zuen pertsona hark mundua zeharkatu zuen fantasiazko eta beldurrezko gure zinema ezagutzera emateko. Zazpigarren arteak izan duen garai zoragarri baten lekuko eta egile loriatsua.

Ume honen istorioaren kapitulu batzuk kontatzera goaz orain, ilargi betean beti konfiantza jarrita, otso gizon bihurtzeko bere amets hura bete zuen umearena. Edo askoz ere hobeto Jacinto Molinak berak kontatzen badigu bere istorioa. Hori bai, mesedez, hari Paul deitu beti.

Antonio Busquets

Proiekzioak:

  • Ordua: 19:00
  • Sarrera: Dohain.
    • Azaroak 25:
      • El hombre que vio llorar a Frankenstein (2010)
        • Angel Agudo. Espainia. 77 min
    • Azaroak 26:
      • The Legend of El Hombre Lobo (2019)
        • Dorian Cleavenger. AEB. 40 min
      • La sonrisa del lobo (2014)
        • Javier Perea. Espainia. 44 min

Ordutegia:

  • Astelehenetik ostiralera: 10:00 - 14:00 / 16:00 - 20:30
  • Larunbatak: 10:00 - 14:00 / 16:30 - 20:00
  • Azaroak 1 / abenduak 6-8: 11:00 - 14:00 / 17:00 - 20:00
X