Jaialdiak

Zinema, antzerkia, musika, beldurra..

Zinema, antzerkia, musika, beldurra… Donostian era guztietako jaialdiak ditugu.
Aukera ezazu zure estiloari ondoen doakiona!

DFERIA ANTZERKI AZOKA

Donostia, benetako antzerkia

Musikaren, dantzaren, antzerkiaren edo edozein eratako adierazpen artistikoaren zale amorratua bazara…Ez galdu hitzordu hau! Dferiak Donostia arte eszenikoen merkatu handi bihurtzen du antzerki sorkuntzarik berrienak aurkeztuz. Gerturatu eta disfrutatu kalitate handiko ikuskizun berriztatzaile hauetaz!

GIZA ESKUBIDEEN ZINEMALDIA

Solidaritatea zinemaren bidez

Urtero, apirilean, Donostiak gizartearekin eta solidaritatea sustatzearekin duen konpromisoa sendotzen du Giza Eskubideen Zinemaldia eginez. Zineman oinarrituta eta erakusketa eta elkarrizketekin osatuta, ekitaldiaren xedea da herritarrak gure gizartean ugariak diren arazo larrien eta errealitateen inguruan sentsibilizatzea.

Dock of The Bay, maiatzaren 2tik 7ra

Musika dokumentalen zinemaldia, hitzaldiak eta kontzertuak barne. 

Dock of the Bay zinema dokumental musikaleko jaialdia da, hiriko hainbat tokitan proiekzioak, hitzaldiak eta kontzertuak tartekatzen dituena. Benetako luxua musika eta zinema maite dutenentzat.

JAZZALDIA

Jazzaren goxotasuna

Uztaileko bigarren hamabostaldian, Donostia jazzaren erritmorik onenean mugitzen da. Musika-arloko izen handiko artistak, besteak beste James Brown, Liza Minelli, Bobby McFerrin, Diana Krall, Cassandra Wilson eta B.B. King, gure hiriko hondartza, antzoki, plaza eta auditorioetara etorri dira nazioartean ospe handian duen jazzaldi honetan entzuleei gozaraztera.

MUSIKA HAMABOSTALDIA

Musika klasikoaren jaialdia

Abuztuan Donostia tradiziorik handieneko musika klasikoko zikloaren etxe bihurtzen da, Musika Hamabostaldia egiten baita. Kursaal Elkargunea, Santa Maria eta San Bizente elizak, Victoria Eugenia antzokia eta gure hiriko beste hainbat toki izaten dira nazioarteko orkestra sinfoniko eta bakarlari handien agertoki jaialdi honetan. Ia hilabete batez, musikarik onena izaten da Espainiako zaharrena (1939an hasi zuen bere ibilbidea) eta Europako zaharrenetako bat den musika klasikoko jaialdi honetan.

DONOSTIA FESTIBALA

Donostia Festibala hiriko jaialdirik gazteena da. Alabaina, bere ibilbide laburrean, garbi erakutsi du jaialdi desberdina dela.  Irailean, parerik gabeko jaialdia duzu. Zuzeneko musika duen nazioarteko asteburua. Agertoki paregabean: Lasarteko Hipodromoan

Hori guztiari esker, Donostia Festibala musika-esperientzia paregabea da, bertara joaten direnek nazioarteko izen handiko bandak bi eszenatokitan ikusteko aukera baitute, ondo pasatzen ari direla… egun argiz. Ezin ordainduzko esperientzia, inondik ere.
 

DONOSTIAKO NAZIOARTEKO ZINEMALDIA

Zine hiria

Ospe handiko izarrak eta zuzendari gazteak. Estatuko nahiz nazioarteko zinemaren panorama osoa etortzen da Donostiara urtero irailean urteko lehiaketarik kosmopolitenean parte hartzeko: Zinemaldian, besteak beste Canneseko Zinemaldiarekin eta Veneziako Mostrarekin batera Europako zinema-gertaerarik garrantzitsuenetako batean, alegia.

FANTASIAZKO ETA BELDURREZKO ZINEMAREN ASTEA

Halloween kulturalena

Urriaren amaieratik azaroaren hasierara bitartean, Donostiako antzoki eta kaleak beldurrezko film baten bat-bateko agertoki bihurtzen dira, Fantasiazko eta Beldurrezko Zinemaren Asteari harrera egiteko. Zikloan, kontzertuak eta erakusketak ere izaten dira, zinema-eskaintzaren osagarri.

---

---

---