Kirolaz eta kulturaz gozatu Korner, Kultura & Futbol Festibalarekin!

Korner festibalaren bigarren edizioa martxan da! Futbolaren eta kulturaren munduak batzen dituen festibala Donostian izango da otsailaren 4tik 10era eta jarduera interesgarriz josita datorkigu aurten. 

Antzoki Zaharrak, Tabakalerak, Victoria Eugenia Antzokiak eta Alde Zaharreko San Jeronimo aretoak hartuko dute festibalaren programazio zabala astean zehar: solasaldiak, mahai-inguruak, pelikulen proiekzioak, irratsaio baten grabazioa, argazki erakusketa, bertso saioa eta dantza ikuskizuna, besteak beste, derbiaren gaia ardatz nagusitzat hartuta. Izan ere, Korner jaialdiari hasiera eta amaiera ematen dioten asteburuetan derbiak izango dira Anoetan: gizonezkoen eta emakumezkoen derbiak Real Sociedad eta Athletic Club taldeen artean.

Aukera zabala eta anitza eta egitarau oso erakargarria prestatu du festibalak! Sarrera moduan, otsailaren 3an, Bertso Derbia burutuko da Antzoki Zaharrean. Bertan, bi bertsolari talde arituko dira aurrez aurre, bakoitza Real Sociedaden edo Athletic Club de Bilbaoren alde abestuz.

bertsoa-kornerArgazkia: Korner

Astelehenean, euskal futbolaren bi legendak emango diote hasiera festibalari: Luis Arconadak eta Jose Angel Iribarrek euren ibilbidea gogoratuko dute eta Real Sociedad eta Athletic Club taldeen azken aldiko historiaz mintzatuko dira. Asteartean proiektatuko diren ‘Evasión o victoria’ eta ‘Diamantino’ filmen ostean, asteazkenean Michael Robinson aurkezleak SER irratiko ‘Acento Robinson’ irratsaioa zuzenean igorriko du Antzoki Zaharretik.

korner-hitzaldiakArgazkiak: Korner

Ostegunean, euskal kulturaren munduko hainbat aurpegi ezagunek futbolaren garrantziak euskal sortzaileengan duen eraginaz arituko dira, eta ostiralean Olga Viza aurkezleak emakumezkoen futbolari buruzko mahai-ingurua gidatuko du. Emakumeek kirol honen praktikan izan duten bilakaera Bulebarrean ikusi ahalko dugun argazki-erakusketaren gaia ere izango da.

korner-erakusketaArgazkiak: Korner

Azkenik, asteburuan Kukai Dantzak eta Realak ‘Kirol Legez/Fair Play’ izeneko ikuskizuna aurkeztuko dute Tabakaleran, Korner festibalerako sortutako koreografiarekin.

korner-kukaiArgazkia: Korner

Zeren zain zaude gonbidapenak eskuratzeko? Programa kontsultatu Korner festibalaren webgunean.

X